ភ្នំពេញ៖ រដ្ឋបាលរាជាធានីភ្នំពេញ បានសម្រេចផ្ដល់ភារកិច្ចដល់ខណ្ឌទាំង១៤ សហការជាមួយមន្ទីរអប់រំ មន្ទីរវប្បធម៌ មន្ទីរកិច្ចការនារី និងមន្ទីរសុខាភិបាល ចុះចាត់វិធានការត្រួតពិនិត្យ តាមដាន ឃ្លាំងមើល និងចាត់វិធានការ ចំពោះសកម្មភាពមិនប្រក្រតីទាំងឡាយញណា ដែលអាចកើតមានក្នុងឱកាសទិវានៃក្ដីស្រលាញ់។
ក្នុងសេចក្ដីជូនដំណឹងចុះថ្ងៃទី១៣ ខែកុម្ភៈ ឆ្នាំ២០២២ អភិបាលរាជធានីភ្នំពេញ លោក ឃួង ស្រេង បានហាមឃាត់ការធ្វើសកម្មភាពជួបជុំប្រមូលផ្ដុំក្នុងចំណោមសិស្ស-និស្សិត និងយុវជន-យុវនារី តាមគ្រប់រូបភាពនៅតាមគ្រឹះស្ថានសិក្សាសាធារណៈ និងគ្រឹះស្ថានសិក្សាឯកជន ព្រមទាំងទីតាំងសាធារណនានា ក្នុងភូមិសាស្ត្រារាជធានីភ្នំពេញ ដោយបារម្ភពីការឆ្លងរាលដាលនៃជំងឺកូវីដ-១៩ អូមីក្រុងចូលក្នុងសហគមន៍ទ្រង់ទ្រាយធំ។
រដ្ឋបាលរាជធានីភ្នំពេញក៏ជំរុញដល់គណៈគ្រប់គ្រងគ្រឹះស្ថានសិក្សា លោកគ្រូ អ្នកគ្រូ មាតាបិតា និងអាណាព្យាបាលទាំងអស់ ត្រូវខិតខំធ្វើការអប់រំ ណែនាំដល់សិស្ស-និស្សិត និងបុត្រធីតាគ្រប់រូបឱ្យគោរពនូវទំនៀមទម្លាប់ វប្បធម៌ និងប្រពៃណីរបស់ជាតិខ្មែរកុំឱ្យពួកគេយល់ច្រលំ ទិវានៃក្ដីស្រលាញ់ថ្ងៃទី១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួបរវាងគូសង្សារ និងដើម្បីជៀសវាងការប្រព្រឹត្តិខុសសីលធម៌ផ្សេងៗ។
រដ្ឋបាលរាជធានីភ្នំពេញដល់រដ្ឋបាលខណ្ឌទាំង១៤ ឱ្យសហការគ្នាជាមួយមន្ទីរពាក់ព័ន្ធអនុវត្តតាមខ្លឹមសារនៃសេចក្ដីណែនាំនេះ ឱ្យមានប្រសិទ្ធភាពនិងទទួលខុសត្រូវ៕
